Abakenyezi babiri bishwe barashwe n’abacungera umukuru w’igihugu Evariste Ndayishimiye ku kirimba ciwe i Kiriri kw’igenekerezo rya 28 kigarama 2024 ni Sinzokira Espérance batazira Mahereni hamwe na Niyonzima Francine, bose baturuka ku mutumba Kirombwe wo muri zone Muyira muri komine Kanyosha iri mu ntara ya Bujumbura. Igihe baraswa, itororokanirizo ry’amakuru “Le Mandat” ntiryari bwamenye umwidondoro wabo.
Abo bakenyezi babiri barashwe n’abacungera ikirimba c’umukuru w’igihugu c’Uburundi nk’isaha icumi z’ubucagucagu kuri uwo musi wa gatandandatu. Bamwe mu banyagihugu baba muri karitiye ya Kiriri iri muri zone Rohero ya komine Mukaza mu gisagara ca Bujumbura babwiye itororokanirizo ry’amakuru “Le Mandat” ko bari bumvise inkoho zivuga mu bucagucagu ariko ko batari bwamenye ivyabaye.
Itororokanirizo ry’amakuru “Le Mandat” ryashoboye kumenya ko icatumye abo bacungera umukuru w’igihugu babarasa ari uko boba barabahagaritse baciye i ruhande y’ikirimba ariko barateba guhagarara. Ariko, abo bakenyezi bari basanzwe badandaza isombe kw’isoko ya JABE co kimwe n’abandi banyagihugu baja kwisumamwo mu gisagara ca Bujumbura basanzwe baca i ruhande y’ico kirimba bamanutse ku murwa mukuru w’ubutunzi.
Ayandi makuru twaronse ni uko abo bakenyezi bahambwe n’imiryango yabo uwo musi nyene bicwa barashwe.
