Abanywanyi babiri b’umugambwe CNL bakora mu kabare “Kwa Mbagwa” muri karitiye Mutanga Sud iri muri zone Rohero yo muri komine Mukaza mu gisagara ca Bujumbura barakubiswe barashaya n’imbonerakure mw’ijoro ry’uwa 24 ushira uwa 25 Kigarama 2024 nk’uko twari twabishikirije. Umwe muri bo yitwa Adolphe n’ubu ntarasubira kuboneka. Hari amakuru avuga ko yoba yarishwe. (Le Mandat)
Abanyagihugu bo muri karitiye Mutanga Sud baheruka kubona Adolphe Itangishaka ashorewe n’abaporisi bari kumwe n’imbonerakure mw’ijoro ryo ku wa 24 ushira uwa 25 mu kwezi kw’12 muri uwu mwaka uheruka kurangira w’2024 akuwe mu kabare yakoramwo k’umukozi wo mu nama nkenguzamateka batazira Mbagwa. Hafi indwi zitatu zikaba zigiye guhera uwo munywanyi w’umugambwe CNL ayoboka Agathon Rwasa atarasubira kuboneka. Bamwe mu banyagihugu bavuga ko Adolphe Itangishaka yoba yarishwe.
Bakubiswe n’imbonerakure ari babiri
Adolphe Itangishaka w’imyaka 27 na Magnus Nimbona w’imyaka 29 bakora bose uko ari babiri mu kabare ka Kwizera Dieudonné batazira Mbagwa asanzwe ari umushoferi mu nama nkenguzamateka, akaba akorera n’iperereza ry’Uburundi.
Ababibonye bavuga ko hari nk’isaha indwi z’ijoro ry’uwo musi wa kabiri ushira uwa gatatu igihe imbonerakure zirimwo Egide, Thierry na Bosco zinjira muri ako kabare zitangura kubakubita zivuga ko zibahora ko ari abayoboke ba Agathon Rwasa.
Ayo makuru amenyesha kandi ko abaporisi bari barongowe n’uwo batazira Wanyenyi baciye bahashika abo banywanyi babiri ba CNL babaye intere, baca bafadikanya n’izo mbonerakure mu kubajana ahatamenyekanye.
Bukeye mu gatondo ko ku wa gatatu, igenekerezo rya 25 Kigarama 2024, Magnus Nimbona yari asanzwe yotsa inyama muri ako kabare, yabonetse aremvye ari ikiruruma aho yariko aravurirwa. Mu nyuma, yahavuye akira n’aho mu ndwi iheze yasubiye gukubitwa cane n’izo mbonerakure nyene zo muri karitiye Mutanga Sud. Ico gihe yakubitwa ubwa mbere, Magnus Nimbona yarasahuwe amafaranga ibihumbi amajana atandatu (600.000) n’izo mbonerakure ku bw’amakuru itororokanirizo ry’amakuru “Le Mandat” ryaronse.
Inyuma yo kwandika iyi nkuru ku rubuga rwacu rwa Facebook kw’igenekerezo rya 25 Kigarama 2024, bamwe mu banyagihugu baba hafi y’akabare k’uwo batazira Mbagwa barafashwe n’igiporisi baja gupfungwa ariko baciye barekurwa. Igiporisi cababaza ivyo bazi kuri abo banywanyi ba CNL bakubiswe, umwe akanyuruzwa. Kuva ico gihe, imbonerakure ziguma ziboneka ari nyinshi mu micungararo y’ako kabare umwanya munini nk’uko abanyagihugu bahaba babivuga.
Gushika kuri uwu wa mbere, Adolphe Itangishaka, yari asanzwe ajejwe ivyo muri ako kabare (gérant), ntarasubira kuboneka inyuma y’aho ashorerewe n’izo mbonerakure ziri kumwe n’abo baporisi.
Ifoto : Akabare ka Kwizera Dieudonné batazira Mbagwa
