Kuri uwu wa kabiri, igiporisi cavuze ko cafashe abapasitori 11 inyuma y’igandagurwa ry’abapasitori 2 aribo Jean-Gordien Niyungeko, yaserukira isengero EUSEBU mu Burundi hamwe na Salvator Nzambimana yari mu ndongozi z’iryo sengero muri Reta Zunze Ubumwe za Amerika.
Muri abo bapasitori 11 bafashwe, umunani ni ab’i Nyanza-Lac mu ntara ya Makamba hamwe na batatu bo mu gisagara ca Bujumbura ku bwa Pierre Nkurikiye avugira ubushikiranganji bw’intwaro yo hagati mu gihugu, iterambere rusangi n’umutekano.
Pasitori Jean-Gordien Niyungeko na Salvator Nzambimana bishwe barashwe mw’ijoro ryo ku musi wa gatandatu, kw’igenekerezo rya 2 Ndamukiza mu 2022, hari muri karitiye ya Ruziba muri zone Kanyosha iri muri komine Muha mu gisagara ca Bujumbura.
