{"id":501,"date":"2023-11-19T13:57:08","date_gmt":"2023-11-19T12:57:08","guid":{"rendered":"https:\/\/lemandat.org\/kir\/?p=501"},"modified":"2023-11-19T14:08:08","modified_gmt":"2023-11-19T13:08:08","slug":"red-tabara-intwazangabo-zibiri-zishwe-zihorwa-guhemuka-no-gucudika-numwansi","status":"publish","type":"post","link":"https:\/\/lemandat.org\/kir\/blog\/2023\/11\/19\/red-tabara-intwazangabo-zibiri-zishwe-zihorwa-guhemuka-no-gucudika-numwansi\/","title":{"rendered":"RED-Tabara : Intwazangabo zibiri zishwe zihorwa guhemuka no gucudika n’umwansi."},"content":{"rendered":"

Umwe mu bishwe ni Komiseri yari ajejwe ibijanye n’ibikorwa vya gisirikare hamwe n’inyigisho za gisirikare mu muhari RED-Tabara. Bamwita C3 muri uwo mugwi witwaje ibirwanisho. Uwa kabiri yishwe bamwita C4. Yari Komiseri ajejwe ububiko, uburaro, ukwunguruza hamwe n’ukugaburira abarwanyi. Izo ntwazangabo zibiri z’uwo mugwi ufise ibirindiro muri Repuburika ya Demokarasi ya Kongo zariko zirategura kujabukana mu Burundi bamwe mu barwanyi kugira ngo bazoce bishikana nk’uko bari babipfunditse n’ibiro vy’umukuru w’igihugu c’Uburundi. (Le Mandat)\u00a0<\/strong><\/p>\n

Nicolas Niyukuri batazira Gisiga, Komiseri nimero 3, hamwe na R\u00e9verien, Komiseri nimero 4, bishwe n’urwego rwa gisirikare rwo hejuru rw’umugwi uharanira intwaro ishingiye ku mategeko RED-Tabara, haraheze amezi make. Itororokanirizo ry’amakuru Le Mandat ryaronse amakuru avuga ko, imbere y’uko bicwa, abo basirikare babiri bo ku rwego rw’intwazangabo bari bamaze igihe bavugana n’urwego rw’iperereza rw’Uburundi bahujwe n’uwuserukira Uburundi muri Repuburika ya Demokarasi ya Kongo afise icicaro i Kinshasa G\u00e9n\u00e9ral de Brigade Agricole Mwamba Ntirampeba. Uwo nawe yatanguye kuvugana n’izo ntwazangabo zibiri za RED-Tabara bahujwe n’urwego rw’igendereza rwa kimwe mu bihugu vyo mu karere k’ibiyaga binini. Mu matohoza yacu, twaramenye ko ivyo biganiro vyari bifise intumbero yo kujana mu Burundi bamwe mu barwanyi ba RED-Tabara, bari kuba barongowe na Nicolas Niyukuri batazira Gisiga, hanyuma bagaca bishikana ku nzego z’igihugu.<\/p>\n

Ntiturashobora kuronka G\u00e9n\u00e9ral de Brigade Agricole Mwamba Ntirampeba kugira agire ico abivuzeko. Ku ruhande rwa RED-Tabara, ntibemeza kandi ntibahakana igandagurwa rya Nicolas Niyukuri batazira Gisiga hamwe na R\u00e9verien. Umwe mu barongoye abandi mu gisirikare c’uwo mugwi ugwanya Reta y’Uburundi yatubwiye gusa ko izo ntwazangabo zibiri zakoze amakosa hanyuma “zirarengutswa, zirisigura, mu nyuma zica zicirwa urubanza hisunzwe amategeko n’amabwirizwa agenga abarwanyi ba RED-Tabara”.<\/p>\n

Soma n’iyi\u00a0<\/em>Kongo : RED-Tabara ngo barabesha ntisugerejwe<\/a><\/strong><\/p>\n

Muri iyi myaka, umuhari RED-Tabara waratsimbataje cane igisata cawo c’iperereza harimwo n’ibijanye n’ugusuma urusaku. Mu matohoza itororokanirizo ry’amakuru Le Mandat ryagize, ryasanze hari imitego myinshi yatezwe n’inzego z’iperereza mu Burundi no mu karere yasambuwe n’uwo muhari usigaye uvugwa mu biganiro nka vyose bijanye n’amagume azingamitse Uburundi.<\/p>\n

Akarorero ka hafi ni ako ku musi wa kane, igenekerezo rya 16 Munyonyo 2023, igihe umugambwe CNDD-FDD watanguza ku mugaragaro indwi wahariye intwari. Uwo musi, umukuru w’igihugu c’Uburundi\u00a0Evariste Ndayishimiye<\/a>, asanzwe arongoye n’inama nkuru y’inararibonye y’uwo mugambwe uri ku butegetsi, yavuze ko RED-Tabara iri mu migwi yatsinzwe muri kahise, ko rero ubu ata cotera ubwoba Abarundi.<\/p>\n